Thursday, July 17, 2008

ကျန်ရစ်ခဲ့သော ကဗျာစာအုပ်

===

===
စာအုပ်အမည်က “လည်ဆွဲရတနာ မောင့်ကဗျာ”တဲ့။ အားလုံး ကွန်ပြူတာစာစီထားပြီးသား ကဗျာစာမူတခုပါ။ ကွန်ပြူတာ စာရိုက်ပေးသူက ကိုဝင်းညွန့်နဲ့ မနုနုခိုင် ဇနီးမောင်နှံဖြစ်ပါတယ်။ သူတို့က ဆရာတင်မိုးနဲ့ သားသ မီးလို နေကြသူတွေပါ။ အဲသည်အိမ်မှာ နေ့ခင်းနေ့လည် ဆရာ တရေးအိပ်တတ်တယ်။ ကော်ဖီ လဘက်ရည် ကိုလည်း တခွက် တဖလား သောက်တတ်တယ်။ ထမင်းပါ စားသောက်ပြီး ဆေးလိပ်တိုလို့ နေညိုတဲ့အချိန်သို့ ရောက်တော့မှ ကိုဝင်းညွန့် သို့မဟုတ် ကိုကျော်ဝဏ္ဏ တဦးဦးက ဆရာ့ကို ကြိုလာတတ်တယ်။
===
ကျနော့်ထံမှာ ကော်ပီတခုပေးထားတယ်။ ကဗျာစာရွက်တွေ ထည့်ထားတဲ့ စာအိတ်ပေါ်မှာ အထက်မှာဖော်ပြ ထားတဲ့ ကဗျာစာအုပ်အမည် စာတန်းလေးကို ဆရာကိုယ်တိုင် ရေးထားပါတယ်။ ကျနော့်ထံ ပေးထားရခြင်းရဲ့ ရည်ရွယ်ချက်က ဟိုမှသည်မှ စာအုပ်ထုတ်ချင်သူတွေ အလွယ်တကူရအောင် ဆိုတဲ့သဘောပါ။ ဥပမာ-အညာ လမ်းက တမာတန်း ကဗျာစာအုပ်ကို တောင်ကိုရီးယားနိုင်ငံက ထုတ်ဝေခဲ့တာပါ။ ကမ္မကထပြုထုတ်ဝေခဲ့သူများ ကတော့ မြန်မာလူငယ်များနဲ့ ကိုဝင်းပေါ်မောင်၊ ကိုဝင်းမြင့်ဦးတို့ပဲ ဖြစ်ပါတယ်။ သူတို့တတွေဟာ ခင်မင်ရင်းနှီး သူတွေဖြစ်လို့ အကယ်၍ တောင်ကိုရီးယား ဟောပြောပွဲမှာ ဆရာတင်မိုး ရောက်လာရင် မီအောင် တက်သုတ် ရိုက် ထုတ်ဝေခဲ့တဲ့ ဆရာသက်ရှိထင်ရှားချိန်မှာ နောက်ဆုံးထွက်ခဲ့တဲ့ ကဗျာစာအုပ်ပါ။ အဲသလိုမျိုး အခြေအနေ နောက်ထပ်ဖန်လာတဲ့အခါ အစောတလျင် ထုတ်နိုင်အောင် ပေးထားတဲ့သဘောပါ။
===
ကဗျာပုဒ်ရေပေါင်း (၇၄)ပုဒ်ပါ ပါတယ်။ ဒီကဗျာ (၇၄)ပုဒ်ကို ၂၀၀၅-ခုနှစ်၊ ဧပြီလ (၃၀)ရက်၊ စနေ ညနေခင်းမှာ စတင်ရေးသား၍ ၂၀၀၆-ခုနှစ်၊ ဇူလိုင်လ (၃)ရက်၊ အင်္ဂါနေ့နံနက်ခင်းမှာ အဆုံးသတ်ထားတာ တွေ့ရပါတယ်။ ဒီ ကြားထဲမှာ မရေးဖြစ်ဘဲ ပြတ်ကျော်သွားတဲ့ ရက်စွဲလွတ်တွေ ခြားနေတာလည်း ရှိပါတယ်။ ကျနော့်အထင်ပေါ့ဗျာ ဆရာ ကဗျာမရေးဖြစ်တာတော့ မဟုတ်ဘူးဗျ။ နောက်ထပ်အဆင်သင့်တဲ့ စာအုပ်တအုပ်ထဲမှာ ရေးတာဖြစ်လိမ့် မယ်။ ပြီးတော့လည်း တချို့ရက်တွေမှာ နှစ်ပုဒ်ဆက်၍ ရေးထားတာမျိုးတွေ ရှိပါသေးတယ်။
===
ဆရာက ဒီစာအုပ်လေးကို ထုတ်ချင်တဲ့ဆန္ဒရှိတယ်။ စီးပွားရေးအတွက် မဟုတ်ပါဘူး။ ဖတ်ချင်သူတွေအတွက် ကဗျာပန်းလက်ဆောင်ဖြစ်ပါတယ်။ အနုပညာပါတဲ့ တန်ဖိုးရှိသောကဗျာတွေကို ဆရာက အခမဲ့ လက်ဆောင် ပေးတာပါ။ ဆရာ့ကဗျာတွေကို ဘယ်သူကပဲ ယူသုံးသုံးပါ။ ဆရာက ကြည်ဖြူတယ်။ မွေးနေ့ပွဲ၊ မင်္ဂလာပွဲစသည် တွေအတွက် ကဗျာတောင်းလာရင်လည်း လက်မနှေးဘဲ ရေးစပ်ပေးလေ့ရှိတဲ့ဆရာပါ။ တခုတော့ရှိတယ်။ စစ် အစိုးရကို ဖားနေတယ် ထင်တဲ့အဖွဲ့အစည်းတွေကိုတော့ ဆရာက ကန်တော့ဆွမ်းပဲဗျို့။ ကဗျာပေးဖို့နေနေသာ ဒီလူတွေနဲ့ သိပ်ပတ်သက်လေ့ မရှိပါဘူး။
===
ဆရာ့အိမ်မှာ ပုံနှိပ်ထုတ်ဝေမှု မပြုရသေးတဲ့ ကဗျာတွေ များစွာရှိနေပါသေးတယ်။ လည်ဆွဲရတနာ မောင့်ကဗျာ စာအုပ်အဖြစ်သို့ မရောက်သလို စာအုပ်အဖြစ်သို့ မရောက်သေးတဲ့ ဆရာ့ကဗျာ အကောင်းစားလေးတွေ ဆရာ့ မိသားစုတွေက သိမ်းထားပေးပါတယ်။ ဒါလည်းပဲ မထုတ်ဖြစ်ဘဲ ကျန်ရစ်ခဲ့သော ကဗျာစာအုပ်တွေပါ။ ကဗျာကို ချစ်မြတ်နိုးသူများ၊ ဆရာ့စာပေကို တန်ဖိုးထားသူများက ထုတ်ချင်တဲ့ဆန္ဒရှိတယ်ဆိုရင် ဆရာ့သားသမီးတွေက သူတို့ထံမှာရှိတဲ့ ကဗျာစာမူတွေကို ခွင့်ပြုပေးမှာဖြစ်ကြောင်း ကျနော် ယုံကြည်ပါတယ်။ သူတို့တွေလည်းပဲ ဖခင် ကို ချစ်သလို ဖခင်ရဲ့စာပေအနုပညာကို မြတ်နိုးတန်ဖိုး ထားတတ်သူတွေပါ။
===
စာမြည်းအဖြစ် လည်ဆွဲရတနာ မောင့်ကဗျာ စာမူကြီးထဲက ပထမဦးဆုံးဖြစ်တဲ့ကဗျာကို ဖော်ပြလိုက်ပါတယ်။
===
၁။ လမ်းသစ်ပွင့်နေပြီ
=
တောအုပ်ကလေးထဲက
ရွှေအိမ်ကလေး တလုံး
ချိုပြုံးနေတဲ့ မိသားစု
ဘုစု ခရု တပြုံတမနဲ့
ဥုံဖွ မန်းမှုတ်နေရှာတယ်။
=
စံကြီးက ဦးဆောင်
ပျိုးထောင်တဲ့ အမကြီးပါ။
=
အဖေက ပြည်ပြေး
အမေက ရေဝေးမှာ
သားကလေးနဲ့ အတူတူနေပါတယ်။
=
အိမ်ထောင်ဦးစီး စံစံကြီးက
သမီးတယောက် အားထားလောက်အောင်
မြေမြှောက်ပျိုးထောင်
တိုက်ပွဲတွေ အောင်ခဲ့ပါရဲ့။
=
လူ့ဘ၀ဆိုတာ
အနုအလှချည်း မဟုတ်
ကြမ်းကြုတ်ခက်ထန်
ရေဆန် လေဆန် လှော်ခတ်ရစမြဲ။
=
အရေးကြီး တခုကတော့
သွေးစည်းမှုပါ။
=
မပြိုမကွဲ ဖရိုဖရဲ မဖြစ်အောင်
အားသစ်ကြိုးပမ်း၊ ပျော်ပျော်ထမ်းစို့
လမ်းသစ်တွေလဲ ပွင့်နေပြီ။
=
=တင်မိုး
၃၀-၄-၂၀၀၅
(စနေ ညနေခင်း)
===
လည်ဆွဲရတနာ မောင့်ကဗျာများကို အမှတ်စဉ်ဖြင့် ဆက်လက်၍ ဖော်ပြသွားမှာဖြစ်ပါတယ်။ ဆရာတင်မိုး ကွယ် လွန်ခဲ့ပေမဲ့ ဆရာ့ကဗျာတွေ နေရာအတော်များများမှာ ဝေနေဆဲမို့ ဆရာအသက်ရှင်နေဆဲလို့ မှတ်ယူထားပါတ ယ်။ ကလေးကဗျာတွေအဖြစ် မြန်မာကျောင်းသုံးဖတ်စာမှာလည်း ပြဌာန်းထားဆဲဖြစ်ပါတယ်။ သို့အတွက် အနိစ္စ ဒုက္ခနဲ့ အနတ္တ ဘေးဘယာတွေ ပြေးမလွတ်သာပေမဲ့ မြန်မာစာပေနဲ့ ကဗျာတွေရှိနေသရွေ့ဆရာဘယ်တော့မှ သေမှာ မဟုတ်ကြောင်း ဖော်ပြအပ်ပါတယ်ဗျား။
=

0 comments:

မြန်မာပြည် ငြိမ်းချမ်းရေးအတွက် ဂျပန်ရောက်မြန်မာတွေနဲ့အခုလို ဆုတောင်းပေးခဲ့ကြတယ်

လာလည်သွားကြတယ်

About This Blog

  © Free Blogger Templates Blogger Theme II by Ourblogtemplates.com 2008

Back to TOP